(تابع) خطاب الرئيس جمال عبد الناصر في مجلس الأمة بمناسبة افتتاح دورته الخامسة

أوسع وكانت هناك مناقشات في الصحف بدون أدنى تعرض. كانت هناك رقابة عسكرية، وهذه الرقابة العسكرية ضرورية، ولكن كانت هناك آراء حرة تقال ونحن نعتبرها ضرورة أيضاً.

          وكان هناك نقد وكنا نرى أن نترك كل هذه الأبواب مفتوحة، كنا نعتقد إنها ظاهرة صحية ماكنتش مخوفانا.

          وبرضه فيه ناس بعتوا لي جوابات وقالوا لي ليه انت سايب هذه المعارك الصحفية الموجودة في البلد دي بتبين إن فيه انقسام في الرأي العام، وفيه ناس قالوا إن فيه وجهة نظر تعبر عن علي صبري ووجهة نظر تعبر عن زكريا محيي الدين. الكلام اللي بيتقال في المجلات الأجنبية وإن إحنا عندنا أجنحة، جناح يميني وجناح يساري. أنا بدي أقول لكم إن إحنا عندنا وحدة في القيادة، كل الكلام اللي بيتقال عن هذه الأجنحة كلام لا نصيب له من الصحة، وهو إيه اليمين وهو إيه اليسار؟. اليمين واليسار ده عملية نسبية. أنا قرأت مين اللي بيحكم مصر زكريا محيي الدين وإلا علي صبري. وبأقول إن كل ده الغرض منه تشويش وفقدان الثقة. النهاردة فيه رئيس للجمهورية هو جمال عبد الناصر، وفيه نواب لرئيس الجمهورية، وفيه وزراء، وفيه اتحاد اشتراكي. وكلنا لازم نكون مشيين على سياسة واحدة اللي مش ماشي ومش موافق على هذه السياسة بيترك بيسيب. ده الوضع الطبيعي. بدي أقول النهاردة مفيش مراكز قوى ومفيش تجمعات قوى، وده بيخلي الأمر سهل.

          أنا قلت الكلام ده بمناسبة المقالات اللي طلعت في الصحف. أنا كنت بأقول بعد النكسة فيه انفعالات عند كل الناس اللي عايز يتكلم عايز يتكلم اللي عايز يقول رأي محدد بيقول، اللي عايز يقول رأي مخالف بيقول، مفيش ماحصلش ضرر ماحصلش انهيار ماحصلش انقسام. وإحنا كنا بنتعرض لنقد مفيش نظام تعرض لما تعرضنا له من نقد، مفيش نظام انتقد نفسه بالشكل الواسع، ولم يحدث في أي بلد عربي من البلاد التي واجهت ما واجهناه نقد ذاتي كالذي حدث عندنا، ونحن نعتبر هذا دليل صحة.

          شيء آخر في مجال التغيير حساب الانحرافات في جهاز المخابرات الذي تكشف. حصل إنه انكشفت انحرافات في جهاز المخابرات، وحينما اكتشفت مسبنهاش، اللي اشتركوا في هذه الانحرافات اعتقلوا وتعرضوا للتحقيق وحيروحوا للمحاكمة حيروحوا لمحكمة الثورة.

          فيه ناس طبعاً بيلقوا لوم هذه الانحرافات على النظام. أنا بدي أقول إن الانحرافات بتحصل في كثير من أجزاء العالم. المهم إن إحنا نلحق نفسنا ونبتر هذه الانحرافات. الانحرافات اللي حصلت في هذا الجهاز تعرفوها أو يمكن سمعتم عليها أكثر انحرافات رخيصة ومش ده المجال الحقيقة اللي أنا أتكلم فيه.

          حصل في كثير من أجزاء العالم أمثلة، برضه جت لي جوابات إزاي انت ماكنتش عارف؟ إزاي الرئيس ماكنش يعرف بالجاري وبهذه الانحرافات؟. وأنا بأقول النهاردة فرصة إن أنا أرد على هذه التساؤلات، لأن

<14>