( تابع ) خطاب الرئيس جمال عبدالناصر في افتتاح الدورة الثالثة للمؤتمر القومي العام للاتحاد الاشتراكي العربي

معلومات عن خسائرنا- إحنا مش حاندي له.. طبعاً هذه الحرب بنقول إنها إحنا كلنا حساسين ليها.. الشعب عندنا حساس.. يعني بدليل يوم الأحد 20، الشعب حاسس من أول دقيقة، الناس حاسة فعلاً إن فيه معركة، وأن إسرائيل فعلاً خسرت في هذه المعركة، الشعب عنده إحساس، عنده حساسية، الشعب النهاردة عنده ثقة في قواته المسلحة ورغم حملة العدو المركزة والحملة الاستعمارية المركزية ضد القوات المسلحة وضد القوات الجوية اللي الشعب النهاردة يثق في قواته المسلحة وفي قواته الجوية، ولم يتأثر بما تقوله إسرائيل.. طبعاً وواضح وستثبت لكم الأيام أن ثقتكم في محلها بالنسبة لقواتكم المسلحة وبالنسبة لقواتكم الجوية.

         أيضاً يؤثر على كل محاولات الحرب النفسية إحساس الشعب بإنه مستعد يتقبل أي خسائر، مفيش حرب بدون خسائر.. بنحارب ونقاتل.. لازم حيموت مننا ناس زي ماحتموت من أعدائنا ناس ما دمنا نقاتل وما دمنا نلحق بالعدو الخسائر. فالشعب يحس.. إحساسه ظاهر إنه مستعد لتقبل أي خسائر.

أيها الأخوة

         نحن الآن في معركة طويلة ونحن الآن على استعداد لمعركة طويلة.. معركة طويلة لاستنزاف العدو، ويجب أن تكون سياسة الدول العربية كلها سياسة استنزاف، الحرب الخاطفة اللي اتعملت فجأة يوم 5 يونيه مش ممكن تتعمل تاني، فيه حرب مستمرة بيننا وبين إسرائيل.. وأمريكا حتدي إسرائيل طائرات الفانتوم، وإنجلترا بتدي دبابات ودول أخرى بتدي، فيه سباق كبير للتسلح. وكلنا نعرف إن إسرائيل تستطيع أن تضع تحت السلاح نص مليون، إذن عندنا إمكانية التفوق البشري، ولكن لابد لنا إن إحنا نعمل على أن نضع تحت السلاح أكثر من نص مليون، لأن هذه المعركة معركة فاصلة، وعندنا التفوق البشري، ولكن علينا أن نعبئ كل شئ من أجل المعركة زي ما بقول وزي ما قلت المعركة طويلة المعركة كبيرة، وإحنا لسه لم ندخل المعركة الحقيقية، معركة هي لا زالت الآن معركة في بدايتها ولكن يغلب عليها طابع الحرب النفسية.. العدو بيخفي الحقيقة في بياناته، أما حاولوا يهجموا علينا في القوارب وانضربوا قالوا إن ماحصلش وأعلنا هذا الكلام قالوا أبداً ماحصلش وبعدين بعد كده لما انتشلنا جثة قائد الدورية وسلمناها لهم، ثبت للعالم كله انهم هما بيخفوا الحقائق.

         أما جم هاجموا نجع حمادي وقالوا انهم ضربوا نجع حمادي ونسفوا القناطر وانهم غرقوا 300 ألف فدان، ثبت انهم طبعاً كانوا كدابين وبيحاولوا فعلاً انهم بيقولوا لنا مفيش فايدة مهما عملنا همه حيقدروا يضربونا ضربات كبيرة، اللي أنا بدي أقوله واللي أنا عاوز أقوله إن إحنا بنحارب، كلنا نفتكر الحرب سنة 42 حرب بريطانيا ومعركة بريطانيا الحرب العالمية الثانية، إيه اللي حصل في إنجلترا.. إزاي انضربت إنجلترا.. وإزاي رغم كده إنها قدرت تكسب الحرب، لما حانحارب ممكن يجي يضرب لنا كوبري، ممكن يجي يعمل عندنا خسائر في أي منشأة اقتصادية، ولكن اللي أنا بقوله إن إحنا أيضاً قادرين إن إحنا نعمل نفس الشيء. النهاردة قادرين إن إحنا نعمل نفس الشيء، بيضرب لنا مواقع اقتصادية، حانضرب له مواقع اقتصادية، بيضرب مواقع

<18>